Պաղեստինյան ՀԱՄԱՍ խմբավորման կողմից պահվող մնացած իսրայելցի պատանդների ազատ արձակումն անխուսափելի է, կիրակի օրը հայտարարել է ԱՄՆ փոխնախագահ Ջեյ Դի Վենսը՝ խոստանալով, որ ԱՄՆ նախագահ Դոնալդ Թրամփի վարչակազմը ողջ անհրաժեշտ ճնշումը կգործադրի Գազայում ապագա կայունությունն ապահովելու համար։

«Դա իսկապես կարող է տեղի ունենալ ցանկացած պահի», – ասել է փոխնախագահը NBC News-ին տված հարցազրույցում, երբ նրան հարցրել են ՀԱՄԱՍ-ի պատանդների ազատ արձակման ժամկետների մասին։

Ավելի ուշ ABC հեռուստաալիքին տված հարցազրույցում նա հավելել է. «Մենք ակնկալում ենք նրանց կենդանի տեսնել այստեղ առաջիկա 24 ժամվա ընթացքում, հավանաբար վաղը վաղ առավոտյան ամերիկյան ժամանակով, ինչը, իհարկե, Իսրայելում տեղի կունենա ավելի ուշ՝ նույն օրը»։

CBS-ի «Face the Nation» հաղորդման ժամանակ այն հարցին, թե արդյոք Վաշինգտոնը մտադիր է շարունակել ճնշում գործադրել Մերձավոր Արևելքում իրավիճակը կայունացնելու համար, Վենսը հայտարարել է, որ դա կպահանջի «Միացյալ Նահանգների նախագահի կողմից մշտական լծակներ և հետևողական ճնշում»։

Վենսն ընդգծել է նաև, որ Իսրայելում տեղակայվելիք 200 ամերիկացի զինվորականները պատասխանատու կլինեն Գազայում հրադադարի ռեժիմի մոնիտորինգի համար և երբեք նախատեսված չեն եղել որևէ մարտական խնդիր կատարելու համար։ Վենսը հավելել է, որ ամերիկյան զորքերը չեն տեղակայվի պաղեստինյան տարածքում։

«Սա ամեն ինչն է՝ սկսած իսրայելական զորքերի՝ համաձայնեցված գծի վրա գտնվելն ապահովելուց, ՀԱՄԱՍ-ի կողմից անմեղ իսրայելցիների վրա չհարձակվելը երաշխավորելուց մինչև այն, որ նրանք անեն հնարավոր ամեն ինչ՝ ապահովելու համար, որ մեր ստեղծած խաղաղությունն իսկապես պահպանվի», – ասել է Վենսը ABC-ի եթերում։ – Բայց այն միտքը, որ մենք զորքեր ենք տեղակայելու Գազայում, Իսրայելում, մեր մտադրությունների մեջ չէ, դա մեր ծրագրերում չկա»։