Ադրբեջանի հոգևոր առաջնորդ Ալաշուքյուր Փաշազադեն ՄԱԿ-ի գլխավոր քարտուղար Անտոնիո Գուտերեշի հետ նախօրեի հանդիպման ժամանակ կրկին մեղադրանքներ է հնչեցրել Հայ Առաքելական Եկեղեցու հասցեին՝ այն ներկայացնելով որպես «Հայաստանի արտաքին քաղաքականության գործիք»։ Այս հայտարարությունը, ըստ վերլուծաբանների, ոչ միայն համընկնում է ադրբեջանական քարոզչության հետ, այլև զուգահեռներ է քաշում Հայաստանի ներսում գործող որոշ շրջանակների դիրքորոշումների հետ։

Փաշազադեի խոսքերը, որոնք հրապարակվել են Ադրբեջանի պետական լրատվամիջոցներում, կրկին ընդգծել են Հայ Առաքելական Եկեղեցու «ռազմականացմանը» և «քաղաքականացմանը» վերաբերող մեղադրանքները։ Նրա խոսքով՝ եկեղեցին «օգտագործվում է որպես գործիք՝ խաթարելու Ադրբեջանի ազգային անվտանգությունը»։

Հայաստանում այս հայտարարությունները չեն անցել աննկատ։ Իշխանական որոշ շրջանակներ, այդ թվում՝ ՔՊ պատգամավորներ և նրանց աջակցող հասարակական կազմակերպություններ, սկսել են կրկնել նույն մեղադրանքները՝ նշելով, որ Հայ Առաքելական Եկեղեցին «միջազգային քաղաքականության գործիք է դարձել»։ Այս համատեքստում, ըստ վերլուծաբանների, իշխանությունները փորձում են ներքին քաղաքական պայքարում օգտագործել եկեղեցու դեմ ուղղված արտաքին ճնշումները՝ դրանք ներկայացնելով որպես «ազգային անվտանգության հարց»։