Շիական «Հեզբոլլահ» շարժումը ուղերձ է հղել Լիբանանի ղեկավարությանը, որում մերժել է Իսրայելի հետ քաղաքական շփումների մեջ մտնելու հնարավորությունը։

«Լիբանանը չպետք է ներքաշվի Իսրայելի հակառակորդի հետ բանակցությունների մեջ, որոնք չեն ծառայում նրա ազգային շահերին և գոյության սպառնալիք են ներկայացնում պետության համար», - ասվում է կազմակերպության Telegram ալիքում տեղադրված հայտարարության մեջ։

Այնտեղ նշվում է, որ Լիբանանի կառավարությունը «չպետք է ենթարկվի ԱՄՆ-ի կողմից շանտաժին, որպեսզի չհայտնվի վտանգավոր ծուղակում»։ «Այժմ ամբողջ ուշադրությունը պետք է կենտրոնացնել Իսրայելի վրա ճնշում գործադրելու վրա, որպեսզի նա դադարեցնի ագրեսիվ գործողությունները և պահպանի 2024 թվականի նոյեմբերի 27-ի զինադադարի մասին համաձայնագիրը»,- ընդգծվում է տեքստում։

 

Շիական շարժումը հաստատում է իր օրինական իրավունքը «դիմադրել օկուպացիոն բանակին և ժողովրդի հետ միասնական լինել՝ հանուն Լիբանանի ինքնիշխանության պաշտպանության»։ Հաղորդագրության մեջ «շտապողական և սխալ» է որակվում իշխանությունների կողմից ավելի վաղ ընդունված որոշումը, ըստ որի պետք է զինաթափել բոլոր ոչ կառավարական ռազմականացված կազմավորումները, ներառյալ «Հեզբոլլահի» ջոկատները։

Նոյեմբերի 4-ին Հանրապետության նախագահ Ժոզեֆ Աունը հայտարարել է, որ Լիբանանը նախընտրում է դիվանագիտական միջոցներով կարգավորել Իսրայելի հետ հակամարտությունը և բանակցությունները դիտարկում է որպես օկուպացված շրջաններն ազատագրելու միակ հնարավորություն։ Նա պնդել է, որ «բանակցությունների մեջ մտնելու օգտին որոշումը լիբանանցիների համազգային ընտրությունն է»։