Երևանի ավագանու «Բարև Երևան» խմբակցության ղեկավար Անահիտ Բախշյանն այսօր  Երևանի Դավթաշեն վարչական շրջանի Տիգրան Պետրոսյան փողոցում գտնվող կանաչապատ տարածքի ոչնչացման մասին հարցումով դիմել է քաղաքապետ Տարոն Մարգարյանին: Նամակում ասված է.

«Սույն թվականի ապրիլի 30-ին Երևանի ավագանին ընդունեց կարևոր որոշում Երևան համայնքում տեղական ինքնակառավարմանը բնակիչների մասնակցության կարգի մասին, որն անթերի չէ, բայց այնուամենայնիվ որոշման ՏԵՂԱԿԱՆ ԻՆՔՆԱԿԱՌԱՎԱՐՄԱՆԸ ԲՆԱԿԻՉՆԵՐԻ ՄԱՍՆԱԿՑՈՒԹՅԱՆ ՁևԵՐԸ և ՄԻՋՈՑՆԵՐԸ 2-րդ գլխի 4-րդ կետում որպես ձևերից մեկ ամրագրված է համայնքի տարածքում հարցումների անցկացման կազմակերպումը և բնակիչների առաջարկությունների ներկայացման հնարավորությունը:

Երևանի Դավթաշենի Տիգրան Պետրոսյան 17, 19, 21 շենքերի հարակից տարածքի բնակիչները 70 ստորագրություւներով դիմել են ՀՀ նախագահին, ՀՀ վարչապետին, ՀՀ նախագահի վերահսկողության վարչության պետին, ՀՀ ՄԻՊ պաշտպանին, Ձեզ, տիկին Դանիելյանին և ինձ այն մասին, որ այդ կանաչ տարածքում եռահարկ կառուցելու շինարարական աշխատանքների թույլտվություն է նույնիսկ տրված: Ո՞ւր մնաց ավագանու որոշումը և ե՞րբ է այն սկսելու կիրառվել, եթե ոչ՝ այս դեպքում:

Երևանի Դավթաշենի Տիգրան Պետրոսյան 17, 19, 21 շենքերի հարակից տարածքում գտնվող բնակիչների կողմից ստեղծված միակ կանաչ տարածքը, ըստ իրենց նամակի, ինտերնետային հայտարարությամբ հունվար ամսից դրված է վաճառքի 110.000 $ -ով:

Ձեր նախընտրական քարոզարշավի ժամանակ այդ տարածքի բնակիչներին ընտրվելու դեպքում խոստացել եք. «Ոչ մի քար քարի վրա չի դրվի կանաչ գոտու հաշվին» և անընդհատ հայտարարում եք այս մասին:

Նամակին կից ուղարկել են նաև կանաչ տարածքի լուսանկարները:

Առաջնորդվելով ավագանու կայացրած վերոնշյալ որոշմամբ՝ խնդրում եմ պատասխանել հետևյալ հարցերին.

​ Դավթաշենի Տիգրան Պետրոսյան 17,19,21 շենքերի բնակիչները պատշաճ կերպով իրազեկվե՞լ են տարածքը աճուրդի դնելու մասին,

​ կազմակերպվե՞լ է հարցում իրենց կարծիքն իմանալու մասին,

​ Դավթաշենի Տիգրան Պետրոսյան 17,19,21 շենքերի հարակից կանաչ տարածքը դրվե՞լ է աճուրդի,

​ կայացե՞լ է աճուրդը,

​ տրվե՞լ է տարածքի կառուցապատման շինթույլտվությունը:

Պարոն Մարգարյան, հարցերը հրատապ պատասխան են ակնկալում»:

Տիկին Բախշյանը նամակի վերջում շնորհակալություն է հայտնել համագործակցության համար և կից ներկայացրել 70 ստորագրությունների ցանկը: