Երևանի քաղաքապետ Տարոն Մարգարյանը հանդիպել է ՀՀ-ում Ճապոնիայի դեսպանության ժամանակավոր հավատարմատար Կենիչիրո Սասամեի հետ: Ողջունելով հյուրին և ընդգծելով հայ-ճապոնական հարաբերությունների բարձր մակարդակը՝ Տարոն Մարգարյանը համոզմունք է հայտնել, որ հաջորդ տարեսկզբին Երևանում Ճապոնիայի դեսպանատան բացումը նոր որակ կհաղորդի երկկողմ հարաբերություններին և կնպաստի Երևանի ու Տոկիոյի, ինչպես նաև ճապոնական այլ քաղաքների միջև կապերի հաստատմանը:
«Երևանն այսօր ակտիվորեն համագործակցում է աշխարհի մի շարք խոշոր քաղաքների հետ և մենք պատրաստակամ ենք համագործակցություն հաստատել նաև Տոկիոյի հետ: Համոզված եմ, որ փոխադարձ հետաքրքրություն ներկայացնող ոլորտները շատ են և, ըստ այդմ, համագործակցության հեռանկարներն իրոք փոխշահավետ կարող են լինել», - ընդգծել է քաղաքապետն ու հավելել, որ Երևանի քաղաքապետարանն անդամակցում է «Քաղաքապետերը հանուն խաղաղության» կազմակերպությանը, որը նախագահում է Հիրոշիմայի քաղաքապետը: Տարոն Մարգարյանը նաև նշել է, որ մեկ ամիս առաջ Երևանի քաղաքապետարանի հարևանությամբ գտնվող զբոսայգում տեղադրված Հիրոշիմա քաղաքից բերված «Խաղաղության քար» հուշաքարը ևս մեկ ապացույցն է նրա, որ Երևանն իրոք պատրաստ է ճապոնական քաղաքների հետ համագործակցություն ծավալելուն։
Շնորհակալություն հայտնելով քաղաքապետին ջերմ ընդունելության, ինչպես նաև համագործակցության պատրաստակամության համար և կիսվելով Երևանի մասին իր տպավորություններով` Կենիչիրո Սասամեն վստահեցրել է, որ իր լիազորությունների շրջանակում պատրաստ է աջակցել և օժանդակել երկու մայրաքաղաքների միջև կապերի հաստատմանն ու խորացմանը, նաև համոզմունք է հայտնել, որ դեսպանատան բացումից հետո այդ ուղղությամբ աշխատանքներն առավել ակտիվ կլինեն ու կտեղափոխվեն գործնական փուլ:
Քաղաքապետը Տարոն Մարգարյանը մեկ անգամ ևս վերահաստատել է Տոկիոյի և ճապոնական այլ քաղաքների հետ համագործակցության հաստատման և ամրապնդման հարցում Երևանի քաղաքապետարանի պատրաստակամությունը: