ՀՀ Նախագահի թեկնածու, ԱԻՄ նախագահ Պարույր Հայրիկյանի հետ տեղի ունեցած միջադեպի կապակցությամբ այս պահի դրությամբ որևէ պաշտոնական հայտարարություն չի եղել:

Այդուհանդերձ` չի բացառվում, որ ՀՀ նախագահի փետրվարի 18-ի ընտրությունները հետաձգվեն:

Սահմանադրության 52-րդ հոդվածի և Ընտրական օրենսգրքի 98-րդ հոդվածի համաձայն, Հանրապետության Նախագահի թեկնածուներից մեկի համար անհաղթահարելի խոչընդոտներ առաջանալու դեպքում Հանրապետության Նախագահի ընտրությունը հետաձգվում է երկշաբաթյա ժամկետով։ Անհաղթահարելի ճանաչված խոչընդոտները չվերանալու դեպքում նշանակվում է նոր ընտրություն, իսկ քվեարկությունն անցկացվում է նշված երկշաբաթյա ժամկետը լրանալուց հետո՝ քառասուներորդ օրը։

Ընտրական օրենսգրքով սահմանվում է նաև, որ Հանրապետության Նախագահի նոր ընտրությունն անցկացվում է թեկնածուների նոր առաջադրմամբ` արտահերթ ընտրության համար օրենսգրքով սահմանված կարգով:

Ընտրություների հետաձգման հավանականությունը պայմանավորված է Պարույր Հայրիկյանի առողջական վիճակի հետ. եթե վերջինս արագ կազդուրվի և կարողանա շարունակել քարոզարշավը, ապա հետաձգելու անհրաժեշտություն չի լինի:

Պարույր Հայրիկյանի վրա կատարված հարձակումը ՀՀ գործող նախագահ, նախագահի թեկնածու Սերժ Սարգսյանի նախընտրական շտաբի ղեկավարն արդեն իսկ գնահատել է որպես սադրանք` միտված վարկաբեկելու խաղաղ ընթացող ընտրությունները: