Այս գիշեր Երևանում տեղի ուեցած իրադարձությունների մասին միջազգային մամուլի հրապարակումներին եմ հետևում և վտանգավոր տենդենց նկատեցի: Պարզվում է՝ ուկրաինական և ռուսական որոշ լրատվամիջոցներ տեղեկատվական պատերազմ են սկսել Հայաստանի «ինֆորմացիոն» դաշտում: Առաջինները փորձում են Մայդան «կառուցել» այստեղ (անգամ ցույցերին արդեն անուն են տվել՝ Тарифный Майдан), երկրորդները՝ զսպել հակառուսական տրամադրությունների հնարավոր աճը: Պետք է միայն տեսնեք, թե տարբեր սոցիալական ցանցերում ոնց են փորձում մեզ ներքաշել իրենց՝ արդեն իսկ լիարժեք ընթացք ստացած թշնամությանը: Դե ադրբեջանցիներն էլ, բնականաբար, կողքից կրակի վրա յուղ լցնող են աշխատում:

Ստեղծված իրավիճակն առանձնահատուկ լրջություն և ուշադրություն է պահանջում: Չի կարելի թույլ տալ, որ ուկրաինացիները, ռուսները և չգիտեմ թե էլ ովքեր կարողանան ներազդել բողոքի ելած հայ քաղաքացիների ուղեղի ու գործունեության վրա: Այս հարցում բոլորս շատ անելիքներ ունենք ու զգոնության կոչ եմ անում: Մեր խնդիրները մեզ լիովին բավարար են, օտարների սադրանքները հնարավորինս շուտ կանխել է պետք:

Գրել է իր ֆեյսբուքյան էջում քաղաքագետ Հրանտ Մելիք-Շհնազարյանը և հավելել՝

Քիչ առաջ խոսել եմ Ուկրաինայում և Լեհաստանում գործող մի քանի փորձագետների հետ և հիմա արդեն հստակ կարող եմ ասել, որ մտահոգությունս տեղին էր: Այո, Երևանում ստեղծված իրավիճակը լուրջ ուսումնասիրվում է տարածաշրջանում քաղաքական շահ հետապնդող պետություններում ու կենտրոններում: Վստահ եմ՝ շուտով բոլորս կդառնանք իրենց մասնակցության ու ներկայության ականատեսը:

Հիմա իսկապես կարևոր պահ է: Հուսով եմ՝ բողոքի ելած քաղաքացիները կկարողանան խուսափել արտաքին ազդեցություններից և չեն շեղվի իրենց բուն պահանջից: Գիշերը տեղի ունեցած իրադարձությունները ցույց են տվել, որ նրանք կարող են հետևողական լինել և դա շատ լավ է: