ԱԺ-ում 2015թ-ի բյուջեի կատարողականի քննարկմանը ԱԺ «Հայ ազգային կոնգրես» խմբակցության պատգամավոր Լյուդմիլա Սարգսյանը ՀՀ աշխատանքի և սոցիալական հարցերի նախարար Արտեմ Ասատրյանին հարցրեց, թե ապրիլյան պատերազմում զոհվածների ընտանիքներին և վիրավորված զինծառայողներին ինչ աջակցություն է ցուցաբերվել:

Նախարարն ասաց, որ զոհվածների ընտանիքներին օգնելու համար կարիքների ընդհանուր գնահատական է տրվել և այդ ուղղությամբ ծրագրեր են իրականացվել: «Գիտեք, որ մեծ ծավալ կազմեց անհատ քաղաքացիների ու կազմակերպությունների կողմից ինքնաբուխ օգնություն տրամադրելը, և դա ևս նպաստ բերեց սոցիալական խնդիրների լուծմանը»,- ասաց նա:

Պետական մակարդակով ասաց, որ մի շարք օրենսդրական նախաձեռնություններ են արվել, որի մի մասը առաջիկայում կառավարությունը կհաստատի: Նախարարը ներկայացրեց, որ զոհվածների ընտանիքներին մոտ 4 մլն դրամի միանվագ օգնություն է տրամադրվել: Նաև կենսաթոշակներ են սահմանվել, պարգևավճարներ և այլն:

ՀԱԿ պատգամավորը հետաքրքրվեց նաև վարչապետի հանձնարարականից և հարցրեց, թե ինչ օպտիմալացման աշխատանքներ են տարվել: Նախարար Ասատրյանն ասաց, որ վարչապետի հանձնարարականով հանձնաժողով է ստեղծվել և այդ աշխատանքներն ընթացքի մեջ են: Իսկ մեքենաների կրճատման հետ կապված, ներկայացրեց, որ նախատեսված է 41 մեքենա կրճատել:

«Խնայողությունների ապահովումը շարունակական բնույթ է կրում: Բոլոր պաշտոնատար անձինք հստակ գիտակցում են, որ շատ կարևոր է, քանի որ մեզանից յուրաքանչյուրն իր տանը, իր բնակարանում է այդ ռեժիմով ապրում, բնականաբար, դա էլ մեր ընդհանուր տունն է, և նույն մոտեցումը պետք է լինի»,- ասաց նա:

ՀԱԿ պատգամավորը հետաքրքրվեց, թե ինչ աշխատանքներ են իրականացվել հաշմանդամության խնդիրները լուծելու ուղղությամբ:

Ըստ նրա, ազատ տեղաշարժի խնդիրն է կարևորը, որը չի լուծվում: «Հասկանում եմ՝ մեծ միջոցներ են պետք, բայց գոնե բուհերում, հանրային վայրերում պետք է կարողանալ դա ապահովել»,- ասաց նա: