«Ամբողջ հանրապետության տարածքում սկսվել է անձնագրերի տվյալների հավաքագրման գործընթաց»,- այս մասին  այսօր Ազգային Ժողովում  Կառավարություն-Աժ հարց ու պատասխանի ժամանակ  հայտարարեց  ԱԺ «Ժառանգություն»  խմբակցության  ղեկավար  Ռուբիկ Հակոբյանը :

 «Բանը հասել է նրան,  որ  առանձին դպրոցներում ծնողական ժողովների ժամանակ  ուղղակիորեն տարվում է նախընտրելի թեկնածուի  քարոզչություն:  Նաև ղեկավարության կողմից օգտագործվում  է  վարչական ռեսուրս»,-  ասաց պատգամավորն ու դիմեց կառավարությանը, թե արդյոք գործադիր մարմնում տեղյակ  ե՞ն  այդ գործընթացներից  և եթե տեղյակ են ի՞նչ են պատրաստվում անել դրա դեմ :

Ռուբիկ Հակոբյանի հարցին ի պատասխան  վարչապետ  Տիգրան Սարգսյանն ասաց.« Այս բարձր ամբիոնից և պատեհ առիթով հայտարարում եմ, որ գործադիր իշխանության բոլոր օղակների  հստակ հանձնարարական է տրված»,- և հավելեց, որ պատգամավորի կողմից թվարկված դեպքերը  պետք է իսպատ  վերանան մեր երկրից:

«Եվ եթե մենք  կհայտնաբերենք որևիցե կոնկրետ դեպք , որ գործադիր իշխանության մարմինը  անձնագիր է հավաքում  ինչ-ինչ նպատակներով` կապելով դա ընտրությունների հետ, այդ մարդիկ խստագույնս պատժվելու են»,- առանձնացրեց Տիգրան Սարգսյանը:

Վարչապետը հավելեց, որ  կրթության և գիտության նախարարությունը վերահսկողություն է սահմանել, որ ընտրությունների ժամանակ  որևէ  միջամտություն չլինի.«Այդպիսի արջի ծառայություն մեզ պետք չէ»,- շեշտեց գործադիր մարմնի ղեկավարը: