Գյումրիի նախկին քաղաքապետ Վարդան Ղուկասյանի եղբորորդու՝ Վահե Ղուկասյանի պաշտպան Հայկ Ալումյանը բողոք է ներկայացնելու առաջին ատյանի դատարան՝ փորձաքննությանը ներկա գտնվելու իր միջնորդությունը մերժելու քննիչի որոշման դեմ:
Պաշտպանը ցանկանում էր ներկա գտնվել Գյումրիի «հակամարտության» գործով նշանակված դեպքի վայրի տեսագրությունների տեսաձայնագրային փորձաքննության անցկացմանը:
Հայկ Ալումյանն ընդգծեց, որ ՀՀ քրեական դատավարության օրենսգրքի 247-րդ հոդվածը սահմանում է փորձաքննություն նշանակելիս ու կատարելիս տուժողի, կասկածյալի, մեղադրյալի իրավունքները, որոնց թվում է քննիչի թույլտվությամբ փորձաքննության կատարմանը ներկա գտնվելու իրավունքը: Քննիչի կողմից մերժումը անակնկալ էր կողմի համար, որովհետև մինչև հիմա, ըստ նրա, ոչ մի քննիչ կամ դատարան, եթե գործը դատարանում է, նման միջնորդություններ չի մերժել: Հ.Ալումյանը նկատեց նաև, որ մերժումը պատճառաբանվել է քննիչի հայեցողությամբ, սակայն չի բացատրվել, թե ինչու է նման հայեցողություն ընտրվել: Ուստի, ըստ փաստաբանի, «այս դեպքում կամակայականորեն չթույլատրեցին ներկա գտնվել փորձաքննությանը»:
Պաշտպանը բողոք է ներկայացնելու նաև Վերաքննիչ քրեական դատարան՝ իր պաշտպանյալին տուժող չճանաչելու քննիչի որոշման դեմ իր բողոքը մերժելու առաջին ատյանի դատարանի որոշման դեմ: Իր պաշտպանյալ Վահե Ղուկասյանը քրեական օրենքով արգելված հրազենային կրակոցի հետևանքով որովայնի շրջանում վնասվածք է ստացել և պետք է տուժող ճանաչվի՝ առավել ևս, որ դեռ պարզ չէ, թե իրականում ո՞վ է առաջինը կրակել:
Վ.Ղուկասյանի պաշտպանը բողոք է ներկայացնելու նաև Վճռաբեկ դատարան՝ ընդդեմ Վերաքննիչ քրեական դատարանի որոշման, որով ուժի մեջ էր թողնվել իր պաշտպանյալին կալանավորելու առաջին ատյանի դատարանի որոշումը: Ըստ պաշտպանի, այս անգամ խնդիրը կոնցեպտուալ է՝ Վերաքննիչ դատարանը սխալ է վարվել՝ շտկելով առաջին ատյանի թերացումները և վերջինիս որոշումը ուժի մեջ թողնելով՝ Վերաքննիչ դատարանն արձանագրել էր, որ կալանավորումն ընտրելու համար բավարար նյութեր չեն ներկայացվել, քննիչից պահանջել այդ նյութերը, ներգրավել դրանք գործում և հետո դրանց հիման վրա անփոփոխ թողել առաջին ատյանի դատարանի որոշումը:
Մինչդեռ ըստ պաշտպանի, Վերաքննիչ դատարանը պետք է գնահատեր առաջին ատյանի դատարանի որոշման օրինականությունը՝ առաջին ատյանի դատարան ներկայացրած նյութերով կարելի՞ էր անձին կալանավորել, թե ոչ: Պաշտպանը գտնում է, որ առաջին ատյանի դատարանները ավելի ճիշտ, արդյունավետ ու օրինական կաշխատեն, եթե վերադաս դատարանը թերությունները վերացնելու փոխարեն, վերացնի առաջին ատյանի դատարանի որոշումը:
Աղբյուրը՝ Փաստինֆո