«ԵԱՀԿ/ԺՀՄԻԳ  ԸԴԱ երկարաժամկետ դիտորդների` Հայաստանում նախագահի ընտրությունների վերաբերյալ  երկրորդ միջանկյալ զեկույցը չի անդրադարձել ՀՀ նախագահի թեկնածու Անդրիաս Ղուկասյանի կողմից առաջադրված պահանջներին  ու դրանց  գնահատականներին»,- այս մասին  գրված է նախագահի թեկնածու Անդրիաս Ղուկասյանի տարածած հայտարարության մեջ:

Նախագահի թեկնածուն  այսօր լրագրողների հետ հանդիպման ժամանակ անդրադառնալով դիտորդական առաքելության զեկույցին նշեց.«Ժողովրդավարության բարիքները  երբեք չեն կարող օգտագործվել կրիմինալ կամ հակամարդկային քաղաքական ուժերի կողմից, որպեսզի նման ուժերը գան իշխանության»:

Անդրիաս Ղուկասյանն ասաց, որ ինքը  զեկույցում չի տեսել իր կողմից բարձրացված հարցերի գնահատականները.« Ըստ ինձ  սա նշանակում է, որ առաքելությունը շրջանցում է այս կարևոր փաստը,  որ էական   նշանակություն ունի ընտրությունների գնահատման համար և փաստորեն առանց ուշադրության թողնելով  դա, անորոշություն ու մոլորություն կարող է ստեղծվել միջազգային հանրության մոտ, բոլոր նրանց մոտ, ովքեր նման զեկույցից փորձում են  Հայաստանում քաղաքական իրավիճակի մասին ստանալ պատկերացում»:

Անդրիաս Ղուկասյանը համոզված է, որ ԵԱՀԿ/ԺՀՄԻԳ  երկարաժամկետ դիտորդների առաքելությունը  Հայաստանում ժողովրդավարության հետ կապ չունի և հետապնդում է այլ նպատակներ:

Հիշեցնենք, որ  նախագահի թեկնածու Անդրիաս Ղուկասյանն արդեն  22-երորդ օրն է ինչ հացադուլ է հայտարարել: Նրա պահանջը դեռ չի փոփոխվել: Ղուկասյանը պահանջում է, որ ԿԸՀ-ն անվավեր ճանաչի գործող նախագահ, նախագահի թեկնածու Սերժ Սարգսյանի  գրանցումը: