Երևանի քաղաքապետարանի և ՄԱԿ-ի զարգացման ծրագրի համատեղ ջանքերով ամբողջությամբ հիմնանորոգվել է թիվ 3 մանկապատանեկան ստեղծագործական կենտրոնը: Մշակութային օջախի բացման հանդիսավոր արարողությանը ներկա են գտնվել Երևանի քաղաքապետ Հայկ Մարությանը, Հայաստանում ՄԱԿ-ի մշտական ներկայացուցիչ Շոմբի Շարփը, ՀՀ բնապահպանության նախարարի պաշտոնակատար Էրիկ Գրիգորյանը, այլ հյուրեր: 1972թ. հիմնադրված կենտրոնում այսօր շուրջ 800 սանի համար նոր ու հարմարավետ պայմաններ են ապահովվել:

«Սա այն է, ինչ հարկավոր է մեր քաղաքին ու մեր երկրին, սա մեր առաջնահերթություններից է և, բնականաբար, Երևան համայնքը հանձնառություն ունի՝ ապահովելու այդ հնարավորությունը մեր երեխաների համար: Եվ ես ուրախ եմ ազդարարել, որ այսուհետև Էրեբունի վարչական շրջանի, և ինչու ոչ՝ նաև մեր քաղաքի այլ թաղամասերում ապրող երեխաները կարող են կրթել և զարգացնել իրենց գեղարվեստական ճաշակը, մարմնամարզության և արվեստի բնագավառում իրենց գիտելիքներն ու հմտություններն այս գեղեցիկ ու ժամանակակից կենտրոնում»,- նշել է քաղաքապետը:

Էրեբունի վարչական շրջանի մանկապատանեկան ստեղծագործական կենտրոնի հիմնանորոգումը Երևանի քաղաքապետարան-ՄԱԿ-ի Զարգացման ծրագիր համագործակցության հերթական օրինակն է, որի հիմքում Էներգաարդյունավետության ու ջերմամեկուսացման բաղադրիչների համակողմանի կիրառումն է: Ի դեպ, ջեռուցման համակարգի արդիականացման արդյունքում տեղադրվել են հատուկ կաթսաներ, որոնց շնորհիվ շենքի սպասարկման ծախսերը կկրճատվեն շուրջ 60 տոկոսով:

Կարևորելով ՄԱԿ-ի Զարգացման ծրագրի հետ համատեղ իրականացվող ծրագրերը՝ քաղաքապետ Մարությանն ընդգծել է, որ երկու կառույցների միջև համագործակցությունը լինելու է շարունակական և ընդգրկելու է նոր ուղղություններ:

«Առհասարակ, պետք է շեշտեմ, որ ՄԱԿ-ի Զարգացման ծրագրի հետ մեր համագործակցությունը խիստ արդյունավետ է: Հատկապես Երևանի կանաչ տնտեսության զարգացման հարցում UNDP-ի աջակցությունը անհնար է գերագնահատել: Այս պահին էլ քննարկումների և իրականացման փուլում են համատեղ մի շարք ծրագրեր, որոնք վստահաբար, ավելի անվտանգ, լուսավոր և հարմարավետ են դարձնելու կյանքը Երևանում»,- նշել է Հայկ Մարությանը:

Հայաստանում ՄԱԿ-ի մշտական համակարգող Շոմբի Շարփն իր հերթին արդյունավետ ու հաջողված է գնահատել Երևանի քաղաքապետարանի հետ ձևավորված համագործակցությունը:

«Սա սքանչելի համագործակցության արդյունք է՝ ՄԱԿ-ի, Երևանի քաղաքապետարանի և ՀՀ բնապահպանության նախարարության միջև: Այս նախագծով մենք կարողացանք լուծել մի քանի խնդիր, այն բազմակողմանի է: Մի կողմից այն բարձրացնում է էներգաարդյունավետությունը, կրճատում կլիմայի վրա ազդեցությունը, նաև կրճատում ծախսերը՝ ապահովելով խնայողություններ: Ամենակարևորը, որ մենք կարողացանք ստեղծել ջերմ, հարմարավետ, հաճելի միջավայր երեխաների համար»,- նշել է Շոմբի Շարփը:

Երևանի քաղաքապետը շրջել է կենտրոնում, ծանոթացել կատարված աշխատանքներին, զրուցել սաների ու աշխատակիցների հետ:

Ծրագրի շրջանակում աշխատանքներ են տարվել շուրջ 6000 քմ տարածքով մասնաշենքերի հարկաբաժինների, դասասենյակների ու սանհանգույցների նորոգման ուղղությամբ: Փոխվել է տանիքի ծածկը, ինչպես նաև ներդրվել է լուսադիոդային և էներգախնայող ժամանակակից համակարգ: