Նախատեսվում է Երեւանի մետրոպոլիտենի երկու կայարան կառուցել։ Այս մասին այսօր՝ հունվարի 24-ին, իր պաշտոնավարման 100 օրն ամփոփելիս նշեց Երեւանի գլխավոր ճարտարապետ Արթուր Մեսչյանը։

«Մենք չենք ուզում տարածվել եւ ապագա զարգացման տենդենցի մեջ նայել այս խնդիրը, որովհետեւ ֆինանսական բավականին մեծ ծախսեր են կապված այդ կառույցի հետ, մենք ուզում ենք սահմանափակվել ամենաստրատեգիական գծով՝ քաղաքը կապենք Աջափնյակի հետ, հետագայում դա կշարունակվի Դավթաշեն, բայց դա կլինի մի փոքր հետո»։


Մեկ այլ կարեւոր ռազմավարական ծրագիր Մեսչյանն առանձնացրեց ճոպանուղու կառուցման ծրագիրը, որը պետք է կապի Նորքի Մասիվը քաղաքի կենտրոնի հետ։ «Ճոպանուղին, ըստ երեւույթին, շատ ավելի արագ կհաջողվի իրագործել, քանի որ գումարային առումով այն ավելի համեստ է մետրոպոլիտենի համեմատ»։

Նրա խոսքով՝ այս ծրագրերը շատ իրատեսական են. «Կարող եմ ասել՝ ռեալ են, ուղղակի պետք է աշխատել: Կարծում եմ՝ այս հարցում մեզ կօգնի Քաղաքաշինության կոմիտեն եւ կառավարությունը: Եվ մենք կկարողանանք այս կարեւորագույն խնդիրները տանել առաջ»։

Նա շեշտեց՝ բավականին լուրջ ծրագիր կա մունիցիպալ շինարարության հետ կապված, առանձնապես վթարային շենքերում բնակվող մարդկանց տեղափոխելու հարցերում. «Գտել ենք մի քանի հետաքրքիր տարբերակ, մենք կկարողանանք Աջափնյակում այդ խնդրի լուծումը գտնել, ընդ որում խոսքը մի քանի տարվա կտրվածքի մասին չէ, այլ հնարավոր է մոտակա ամիսներին էլ սկսվի այդ գործընթացը»,–եզրափակեց Երեւանի գլխավոր ճարտարապետը։