Սալսա, հիփ-հոփ, լատինո, տանգո, վալս, ջայվ, այս ամենը ներկայացվում է «Պարիր, թե կարող ես» նախագծում, որը շուտով կմոտենա իր ավարտին, և արդեն հայտնի են կիսաեզրափակիչ անցած վեց մասնակիցների անունները: Նրանք են` Լոլան, Արմինան, Անին, Հովոն, Արմանը և Վահանը: Կիսաեզրափակչում մասնակիցները ներկայացրել են հետևյալ պարերը` ջազ, ջայվ, չաչաչա, ժամանակակից, ռումբա և հիփ-հոփ: Մասնակիցներից վեցն էլ օժտված են առանձնահատուկ տաղանդով և ողջ նախագծի ընթացքում ներկայացրել են փայլուն համարներ, հատկապես դասական պարուհի Լոլա Քարամյանի ելույթները առանձնանում են իրենց զգացմունքայնությամբ և հմայքով: Նախագծի ժյուրիի անդամներն իրենց գոհունակությունն են հայտնում բոլոր մասնակիցների ներկայացրած ելույթների վերաբերյալ, սակայն Լոլայի վերջին ելույթը ցնցեց բոլորին: Ժյուրիի անդամները Լոլայի լավ կատարման հետ այս անգամ գնահատեցին նաև նրա դերասանական խաղը, որը էլ ավելի վառ դրսևորվեց նրա ջազ կատարման մեջ:
Հիշեցնենք, որ «Պարիր, թե կարող ես» շոու ծրագրի շրջանակներում, չորրորդ գալահամերգի ընթացքում` դասական պարուհի Լոլա Քարամյանը զարմացրեց ժյուրիին, ողջ պարը վնասված ծնկով պարելով: Սակայն այդ խոչընդոտները չեն խանգարել, որ պարուհին և նրա պարընկեր Հովհաննես Սարգսյանը զարմացնեն ներկաներին:
Նշենք, որ «Պարիր, թե կարող ես» նախագծին մնացել են վերջին գալա համերգները: