Մինչեւ հուլիսի 10-ը կթանկանան գազը եւ էլեկտրաէներգիան: Ինչպես հինգշաբթի երեկոյան Ազգային ժողովում հայտարարեց Հանրային ծառայությունները կարգավորող հանձնաժողովի նախագահ Ռոբերտ Նազարյանը, քաղաքացիների համար մեկ խորանարդ մետր գազը ներկայիս 132 դրամի (մոտ 0.32 դոլար) փոխարեն կարժենա 156 դրամ: Գազի գնի բարձրացման պատճառով 8 դրամով կթանկանա նաեւ մեկ կիլովատտ/ժամ էլեկտրաէներգիան: 

Կառավարության վստահեցումներով` սոցիալապես անապահով խավերի համար լրացուցիչ փոխհատուցումներ կսահմանվեն:

«Հուլիսի 7-ից 10-ի արանքում, ֆիզիկապես որովհետեւ չենք հասցնի, որովհետեւ այդտեղ պրոցեդուրաներ կան` պետք է պահպանենք, հուլիսի 1-ին չենք հասցնում», -  խորհրդարանում կայացած լսումների ժամանակ թանկացման ակնկալվող ժամկետի վերաբերյալ ասաց Հանրային ծառայությունները կարգավորող հանձնաժողովի նախագահ Ռոբերտ Նազարյանը:

Այս լսումների ընթացքում նա սենսացիոն բացահայտում արեց. պարզվեց` գազի սակագինը ռուսական կողմը դեռ ապրիլի 1-ից է բարձրացրել, սակայն կառավարությունը այդ փաստը հանրությանը չի ներկայացրել, Հայ ազգային կոնգրեսի պատգամավոր Նիկոլ Փաշինյանի բնորոշմամբ` թաքցրել է նախընտրական շրջանը հաղթահարելու համար:

«180 ԱՄՆ դոլարի փոխարեն սույն թվականի ապրիլի 1-ից գործում է 270 ԱՄՆ դոլար գինը [Ռուսաստանից գնվող հազար խորանարդ մետր գազի դիմաց]», - ասաց Նազարյանը:

«Հայաստանի Հանրապետության իշխանությունները Հայաստանի ժողովրդից թաքցրել են իրականությունը, եւ հիմա, ըստ էության, ժողովուրդը ստիպված է լինելու վճարել, այսպես ասած, խորհրդարանական ընտրություններում, նախագահական ընտրություններում եւ քաղաքապետի ընտրություններում իր կատարած չակերտավոր ընտրության համար», - հայտարարեց Փաշինյանը` շարունակելով. - «Սա ուղղակի անթույլատրելի է, եւ իսկապես մեր իշխանության բնույթը ցույց է տալիս, թե ինչպես կարելի է մարդիկ ստրատեգիական նշանակության ինֆորմացիան թաքցնեն»:

Եվ պարզ չէ` մինչեւ նոր սակագնի հաստատումը ով է վճարել եւ դեռ վճարելու ավելի թանկ մատակարարվող գազի դիմաց:

Ազգային ժողովի Դաշնակցություն խմբակցության քարտուղար Աղվան Վարդանյանը փորձեց ռուսական կողմի հետ գազի գնի շուրջ բանակցող էներգետիկայի նախարար Արմեն Մովսիսյանից պարզել, թե գազի գնի խոստացված 30 տոկոս սուբսիդավորումը Հայաստանը ի՞նչ միջոցներով է իրականացնելու` պետական բյուջեի՞ց, ա՞յլ աղբյուրներից, թե՞ վարկ է վերցնելու: Այդ սուբսիդավորումը, հիշեցնենք, կկատարվի սահմանին:

Էներգետիկայի նախարարն ասաց` քանի որ բանակցությունները ռուսական կողմի հետ շարունակվում են, չի կարող աղբյուրը բացահայտել:

Բայց Ազգային ժողովի հանրապետական նախագահ Հովիկ Աբրահամյանը հայտարարեց, որ սուբսիդավորումը պետական բյուջեի միջոցներով չի իրականացվելու:

Չնայած էներգետիկայի նախարարը հավաստիացնում է, որ գազի գնի շուրջ բանակցությունները ռուսական կողմի հետ առաջիկա 5 տարվա համար են վարվում, սակայն Հանրային ծառայությունները կարգավորող հանձնաժողով թանկացումների մասով ներկայացված հայտերը առաջիկա տարվան են վերաբերում:

Իշխանությունը չի թաքցնում, որ գազի թանկացումը նաեւ այլ թանկացումներ կբերի իր հետ:

Ռոբերտ Նազարյանը, օրինակ, իբրեւ հետաքրքրասեր քաղաքացի` հաշվարկել է, որ գազի թանկացման հետեւանքով մոտ 11 դրամով կարող է բարձրանալ նաեւ հեղուկ գազի գինը, որով աշխատում է երթուղային տրանսպորտի հիմնական մասը:

«Գազով պայմանավորված` նրանք կարող են ընդամենը 11 դրամով բարձրացնել իրենց այսօրվա վաճառվող մեկ խորանարդ մետրի գինը: Մնացածի հետ կապված, բնականաբար, չունենք, եւ ես չեմ կարող պատասխանել», - ասաց Հանրային ծառայությունները կարգավորող հանձնաժողովի նախագահը,-այս մասին գրում թ «Ազատություն» ռադիոկայանը: