Հայաստանի երիտասարդական հավաքականի հարձակվող Աղվան Պապիկյանն սկսել է մարզվել Մոսկվայի «Սպարտակի» երիտասարդական թիմում: 19-ամյա ֆուտբոլիստը հարցազրույց է տվել armsport.am-ին:

 - Աղվան, արդեն պայմանագիր ստորագրվե՞լ է «Սպարտակի» հետ:

- Դեռ ոչ: Կստորագրենք, երբ թիմը վերադառնա Մոսկվա:


- Դեռևս հունվարի 3-ին տեղեկություն տարածվեց, որ եղբորդ հետ միասին տեղափոխվելու եք «Սպարտակ», սակայն մոտ 50 օր անց միացար ռուսական թիմին: Ի՞նչն էր պատճառը:

- Այո, երկարեց: Որոշ ժամանակ մտածում էինք, փորձում էինք հասկանալ, որ ճիշտ որոշում է կայացվում:

-Տեղյակ ենք, որ առաջարկներ կային մի շարք այլ ակումբներից, սակայն ընտրվեց «Սպարտակը»...

- Այս ակումբ եմ տեղափոխվում կես տարով և կարծում եմ, որ այս ամիսների ընթացքում շատ բան կունենամ սովորելու «Սպարտակում», իսկ ամռանը պարզ կդառնա, արդյո՞ք, կարող եմ մնալ այստեղ, թե՞ գնալու եմ այլ թիմ: Առաջիկա ամիսները մեծ օգուտ կտան ինձ:

 - Ինչպե՞ս ընդունեցին քեզ «Սպարտակի» երիտասարդական թիմում, որտեղ միակ լեգեոներն ես:

- Նորմալ: Չեմ կարող առանձնահատուկ բան ասել ընդունելության մասին: Թիմը լավ մարզչական շտաբ ունի:

 - Արդեն մասնակցել ես մարզումների: «Լոձի» համեմատ տարբերությունը մե՞ծ է:

- Մարզումներն ինձ դուր եկան, ամեն ինչ շատ լավ էր կազմակերպված: Դժվարանում եմ միանգամից համեմատել, երևի որոշ ժամանակ անց կկարողանամ ավելի հստակ ասել:

 - Ռուսերեն հասականու՞մ ես:

- Ոչ, բայց Մոսկվայում պետք է սովորեմ, որ կարողանում ավելի լավ շփվել մարզիչների ու խաղացողների հետ:

- Իսկ ներկայումս ինչպես ե՞ք հաղորդակցվում:

- Որոշ բաներ հասկանում եմ: Տարբեր ժեստերի և բառերի միջոցով կապը ստացվում է, բայց աստիճանաբար ավելի հեշտ կլինի:

- Շուտով «Սպարտակում» բուժզննում պետք է անցնի ավագ եղբայրդ՝ Վոլոդյան, ով ևս կարող է հայտնվել այդ թիմում: Մոսկվա ընտանիքո՞վ եք տեղափոխվելու:

- Ծնողներս պատրաստվում են հաճախակի այցելել Մոսկվա, սակայն, հիմնականում, նրանք լինելու են Լեհաստանում:

- Իսկ Մոսկվայում ունե՞ս ծանոթներ, հարազատներ...

- Ծանոթներ շատ կան: Հիմնականում հայրիկի ընկերներն են: