Վաշինգտոնից գործող «Policy Forum Armenia» շահույթ չհետապնդող անկախ միությունը մամուլի հաղորդագրություն է տարածել, որի համաձայն Հայաստանում 2013 թվականի փետրվարի18-ին կայացած ընտրությունների արդյունքները ենթարկվել են զանգվածային մեքենայությունների, ազդեցությունների և չեն արտացոլում Հայաստանի քաղաքացիների ազատ կամքը:
 
Հաղորդագրությունում վկայակոչվում է կազմակերպության կողմից իրականացված վերլուծությունը, որի արդյունքները, ըստ «Policy Forum Armenia»-ի, կասկածի տակ են դնում 2013 թվականի փետրվարին Հայաստանում անցկացված նախագահական ընտրությունների ընթացքում տեղ գտած խախտումների ծավալի վերաբերյալ պաշտոնական տեղեկությունները, ԵԱՀԿ/ԺՀՄԻԳ-ի դիտորդական առաքելության հայտարարությունը, ինչպես նաև Արևմուտքի լրատվական գործակալությունների հաղորդագրությունները:
 
Հայտարարությունում, մասնավորապես, ներկայացված են ընտրությունների ընթացքում տեղ գտած խախտումների մասին վկայություններ ներկայացրած անձանց հաղորդագրությունների, հայաստանյան լրատվամիջոցների, ինչպես նաև կազմակերպության սեփական վերլուծության ամփոփ արդյունքները:
 
Այսպես, հայտարարությունում նշված է, որ Հայաստանում անցկացված նախագահական ընտրությունների ընթացքում տեղ են գտել ընտրողների մասնակցությունն արհեստականորեն ակտիվացնելու զգալի ծավալների հասնող համակարգված գործողություններ, որոնք իրականացվել են՝ հօգուտ Հայաստանի գործող նախագահ Սարգսյանի:
 
Բացի դրանից, ընդդիմադիր թեկնածու Րաֆֆի Հովհաննիսյանի և այլ թեկնածուների օգտին տված ձայները, ըստ հաղորդագրության, անօրինական եղանակով վերագրվել են Սերժ Սարգսյանի օգտին:
 
Ըստ կազմակերպության հայտարարության, ընտրողների մասնակցության մասին տվյալներն արհեստականորեն բարձրացվել են, ի թիվս այլոց, նաև ընտրատուփերի լցոնման միջոցով:
 
«Կան տվյալներ այն մասին, որ անվավեր քվեաթերթիկները հաշվարկվել են հօգուտ գործող նախագահի: Առկա են նաև բազմաթիվ վկայություններ գյուղական վայրերի ընտրատեղամասերում ձայների հաշվառման ընթացքում տեղ գտած խարդախությունների մասին» - ասված է հայտարարության մեջ:
 
«Վերլուծության արդյունքները, բացի այդ, հարցականի տակ են դնում Հայաստանի համատեքստում օտարերկրյա դիտորդների ունեցած դերակատարությունը, մասնավորապես նրանց անկողմնակալությունն ու գնալով կատարելագործվող խարդախությունները հայտնաբերելու ունակությունը», - պնդում է «Policy Forum Armenia»-ն:
 
«Հորդորում ենք Րաֆֆի Հովհաննիսյանին և նրա կողմնակիցներին հաստատակամորեն պահանջել քվեների ամբողջական ծավալի վերահաշվարկ կամ հայտարարել ընտրությունների արդյունքների անվավեր լինելու մասին, որոնք երկրի և ժողովրդի առաջընթացի և զարգացման համար միակ հեռանկարային միջոցներն են», - եզրափակում է «Policy Forum Armenia»-իկողմից տարածված հայտարարությունը: