Հունվարի 18-ին Աթենքի «Կալութա» թատերասրահում Հայոց ցեղասպանության 100-րդ տարելիցի միջոցառումները համակարգող Հունաստանի կենտրոնական հանձնախումբը կազմակերպել էր Ցեղասպանության 100-րդ տարելիցի միջոցառումներին նվիրված երեկույթ, հայտնում է ԱԳՆ մամլո ծառայությունը։

Միջոցառմանը ներկա էին հունահայ համայնքի կուսակցական, կրոնական, միութենական, մշակութային կառույցների ատենապետեր և ղեկավարներ, «Հայաստան» համահայկական հիմնադրամի հունաստանյան մասնաճյուղի, հայ-հունական բարեկամության խմբի, հայ-հունական առևտրի և արդյունաբերության պալատի ներկայացուցիչներ:
Կազմակերպիչ մարմնի կողմից բացման խոսքով հանդես եկավ օրվա բանախոս Արաքսի Աբելյան-Քոլանյանը` իր խոսքում կարևորելով միջոցառումների համահայկական և համագաղութային բնույթը, ինչն արտացոլում է հայության արդար պահանջատիրության հանձնառու և վճռական կեցվածքը:

Իր ելույթում Հունաստանում ՀՀ դեսպան Գագիկ Ղալաչյանը ներկայացրեց Հայոց ցեղասպանության 100-րդ տարելիցի միջոցառումները համակարգող պետական հանձնաժողովի ծրագրերը` ընդգծելով անցկացվելիք միջոցառումների կարևորությունը քաղաքական առումով` ցեղասպանության` իրբև մարդկության դեմ ծանրագույն հանցագործության ճանաչման, դատապարտման և կանխարգելման համատեքստում: Դեսպանը ներկաներին հորդորեց գործուն մասնակցություն բերել միջոցառումների իրականացման ողջ ընթացքին:

Ելույթներով հանդես եկան ՀՅԴ կենտրոնական կոմիտեի ներկայացուցիչ Քերոբ Էքիզյանը և Ռամկավար ազատական կուսակցության Շրջանային վարչության ներկայացուցիչ Գալուստ Ռուստեմյանը` համապատասխան կուսակցությունների անունից համախմբման և միասնականության ուղերձ հղելով ներկաներին:

Այնուհետև Արաքսի Աբելյան-Քոլանյանը ներկայացրեց Հայոց ցեղասպանության 100-րդ տարելիցի միջոցառումները համակարգող Հունաստանի կենտրոնական հանձնաժողովի նախաձեռնած միջոցառումների շարքը: Նշվեց նաև, որ ողջ տարվա ընթացքում համայնքային բոլոր կառույցներն ու միությունները հանդես կգան քարոզչական, բարեգործական, մշակութային, մարզական ու բնապահպանական տարաբնույթ նախաձեռնություններով:

Հայոց ցեղասպանության 100-րդ տարելիցի միջոցառումների խորհրդանիշի վերաբերյալ տեսահոլովակի ցուցադրությամբ մեկնարկեց երեկույթի գեղարվեստական հատվածը, որի ընթացքում ներկաները հնարավորություն ունեցան ունկնդրելու Կոմիտասի, Աշուղ Շերամի, Արամ Խաչատրյանի, Նուբար Ասլանյանի, Ալեքսանդր Հարությունյանի ստեղծագործություններից: Ժողովրդական պարեղանակների բեմադրությամբ երեկոն եզրափակեց Համազգայինի «Նաիրի» պարախումբը: