2013 թվականին քաղաքային տնտեսության տարբեր ոլորտներում նախատեսված աշխատանքների ծավալները նախորդ տարվա համեմատ զգալիորեն կաճեն: Մասնավորապես, շինբարեկարգման ծրագրերով ընթացիկ տարում մայրաքաղաքում կիրականացվեն երկուսուկես մլն քմ ծավալով ասֆալտապատման աշխատանքներ: Հիմնանորոգումից հետո փողոցներում ասֆալտի շերտի քանդումը բացառելու նպատակով հանրային սպասարկում իրականացնող բոլոր ընկերություններին քաղաքապետ Տարոն Մարգարյանը հերթական աշխատանքային խորհրդակցության ժամանակ հանձնարարել է նախքան աշխատանքների մեկնարկը ավարտել հաղորդուղիների հետ կապված նորոգման և հիմնանորոգման նախատեսված աշխատանքները:
<<Ծավալները մեծ են, և ծրագրում ներառված են մայրաքաղաքի գրեթե բոլոր վարչական շրջանները: Արդեն իսկ հստակ է նաև հիմնանորոգման ենթակա փողոցների ցանկը, ուստի այդ ցանկը տրամադրեք նաև <<Երևանջուր>>,<<Երևանգազ>> և <<Հայաստանի էլեկտրական ցանցեր>> ընկերություններին, որպեսզի նրանք այդ փողոցներում այս տարվա ընթացքում իրականացվելիք իրենց աշխատանքները պլանավորեն այնպես, որ հիմնանորոգումից հետո այլևս քանդման անհրաժեշտություն չառաջանա>>,- ընդգծել է քաղաքապետ Տարոն Մարգարյանը:

Մինչ հիմնական ծրագրի մեկնարկը, պատասխանատուներին հանձնարարվել է նաև փողոցներում և բակային տարածքներում իրականացնել փոսալցման աշխատանքներ: 
Կանաչ տարածքների պահպանման և ընդլայնման նպատակով 2013թ. մայրաքաղաքում կանցկացվի ևս 20 կմ ոռոգման նոր ցանց: Քաղաքապետը հանձնարարել է այդ մասով աշխատանքների իրականացման ժամանակացույցն այնպես պլանավորել, որ այս տարի նախատեսվող ծառատունկը կազմակերպվի բացառապես ոռոգելի տարածքներում:    
Հարակից ընդհանուր օգտագործման տարածքների պարտադիր բարեկարգման պայմանագրային պարտավորությունների կատարման վերահսկողության մասով զեկուցվել է, որ չկատարող մի քանի տնտեսվարողների նկատմամբ կիրառվել են համապատասխան տույժեր: Պատասխանատուներին հանձնարարվել է հետևողականորեն շարունակել վերահսկողությունը տնտեսվարող սուբյեկտների կողմից իրենց հարակից ընդհանուր օգտագործման տարածքների պարտադիր բարեկարգման մասին Երևանի ավագանու որոշման պահանջների կատարման ուղղությամբ: Բացի այդ, հանձնարարվել է ամենօրյա հսկողության տակ պահել աղբահանության և սանմաքրման աշխատանքների ընթացքը:

Ճանապարհաշինական ծրագրերի շրջանակում սահմանված ժամանակացույցի համաձայն շարունակվում են Ուլնեցու փողոցից Ռուբինյանց փողոց տանող 2.5 կմ երկարությամբ շրջանցիկ նոր ավոտճանապարհի, ինչպես նաև Լենինգրադյան փողոցը Իսակովի պողոտային կապող ավտոմայրուղու կառուցման աշխատանքները: 
Քաղաքապետ Տարոն Մարգարյանը պատասխանատուներին հանձնարարել է ամենօրյա հսկողության տակ պահել կատարվող աշխատանքների ընթացքն ու որակը: 
Մայրաքաղաքում շարունակվում է ամենօրյա հսկողությունը հասարակական ավտոտրանսպորտային միջոցների սպասարկման որակի նկատմամբ: Զեկուցվել է, որ նախորդ շաբաթ ևս մեկ միկրոավտոբուսային երթուղի փոխարինվել է ավտոբուսայինով: Զեկուցվել է նաև, որ փետրվար ամսին քաղաքային տրանսպորտի երթուղիները կհամալրվեն մասնավորի կողմից ներկրված ևս 80 ավտոբուսով: 

Քաղաքապետի հանձնարարությամբ` շարունակվում է սիրիահայ ընտանիքներին սոցիալական աջակցության գործընթացը: Ըստ այդմ, սոցիալական ապահովության վարչության պետը զեկուցել է, որ հունվար ամսվա ընթացքում օժանդակություն է ստացել սիրիահայ 350 ընտանիք, 137 ընտանիքների էլ ցուցաբերվել է անվճար բուժօգնություն: Հանձնարարվել է հետևողականորեն շարունակել սիրիահայերին ցուցաբերվող սոցիալական աջակցությունը: 

Զեկուցվել է, որ ի կատարումն Երևանի քաղաքապետի հանձնարարականի՝ բնակիչներին իրազեկելու նպատակով առավել մատչելի ու տեսանելի վայրում, այդ թվում նաև բազմաբնակարան շենքերում, փակցվել են քաղաքապետարանում և վարչական շրջաններում գործող  թեժ գծերի հեռախոսահամարները, իսկ սեփական տնատիրությունների բնակիչներին առաջիկա շաբաթվա ընթացքում կբաժանվեն նաև համապատասխան վարչական շրջանների աշխատակազմերում գործող թեժ գծերի հեռախոսահամարներով այցեքարտեր: