ՀՀ կառավարությունը իրանական «Սանիր» ընկերությանը լիցենզավորման ենթակա գործունեություն իրականացնելու թույլտվություն կտա՝ Իրան-Հայաստան 400 կՎ էլեկտրահաղորդման օդային գծի կառուցման ծրագրի իրականացման նպատակով:

Այս մասին որոշման նախագիծն ընդգրկված է կառավարության ապրիլի 28-ի նիստի օրակարգում: Ակնկալվում է, որ էլեկտրահաղորդման գծի և համապատասխան ենթակայանի կառուցումը հնարավորություն կտա երկու երկրների էներգահամակարգերի միջև էլեկտրաէներգիայի փոխանակման հզորությունը ներկայիս 300 ՄՎտ-ից հասցնել 1000-1200 ՄՎտ-ի, միաժամանակ բարձրացնել էներգահամակարգերի զուգահեռ աշխատանքի հուսալիությունը և ՀՀ էներգետիկ անվտանգությունը:

«Սանիր»-ը հանդես է գալիս էլեկտրաէներգիայի և ջրի արդյունաբերության ոլորտում որպես կապալառու: Ընկերությունը հարուստ փորձ ունի տարբեր երկրներում, այդ թվում` Հայաստանում էներգետիկ ծրագրեր իրականացնելու գործում, մասնավորապես` նշված ընկերությունը հանդիսացել է Իրան-Հայաստան 220 կՎ էլեկտրահաղորդման առաջին և երկրորդ գծերի, ինչպես նաև Իրան-Հայաստան գազամուղի Մեղրի-Քաջարան հատվածի շինարարության գլխավոր կապալառու:

«Գծի կառուցումը նպատակաուղղված է գազ-էլեկտրաէներգիայի դիմաց ծրագրով հայկական կողմի ստանձնած պարտավորությունների կատարման, ինչպես նաև տարածաշրջանային համագործակցության ապահովմանը»,- նշված է նախագծի հիմնավորման մեջ: