Երեւանի «Ալաշկերտի» եւ Գյումրիի «Շիրակի» միջեւ ֆուտբոլի Հայաստանի առաջնության 11-րդ տուրի խաղից հետո տեղի ունեցած զանգվածային բախումից հետո 2 ակումբները հանդես են եկել պաշտոնական հայտարարությամբ:

Ներկայացնում են թիմերի հայտարարությունները.

«Ալաշկերտ». «Ամբողջ հանդիպման ընթացքում «Շիրակի» երկրպագուները հայհոյանքներ էին հնչեցնում «Ալաշկերտի» գլխավոր մարզիչ Աբրահամ Խաշմանյանի հասցեին եւ քարեր էին նետում ալաշկերտցիների պահեստային նստարանի ուղղությամբ: Գյումրեցի երկրպագուներին «դուր չէր գալիս», որ մրցակցի գլխավոր մարզիչն ամբողջ խաղի ընթացքում ակտիվ ցուցումներ էր տալիս իր ֆուտբոլիստներին:

Այն բանից հետո, երբ «Ալաշկերտը» վերջին րոպեին հաղթանակ կորզեց, կրքերը էլ ավելի թեժացան, իսկ հանդիպման ավարտից անմիջապես հետո «Շիրակի» աշխատակիցներից մեկը, ով հանդիպման ընթացքում նստած էր պահեստայինների նստարանին, հարվածեց Աբրահամ Խաշմանյանին: Միանգամից խաղադաշտ փորձեցին ներխուժել «Շիրակի» երկրպագուները, որոնց մի մասի մուտքը խաղադաշտ ոստիկանները կարողացան կանխել, սակայն մի քանի երկրպագուներ ներխուժեցին խաղադաշտ մասնաշենքի կողմից եւ ակտիվորեն ներգրավվեցին քաշքշուկին` հարձակվելով «Ալաշկերտի» մարզչական շտաբի վրա:

Կրքերը հաջողվեց հանդարտեցնել միայն «Ալաշկերտի» նախագահ Բագրատ Նավոյանի եւ ոստիկանության աշխատակիցների միջամտությունից հետո:

Խաղից հետո էլ «Շիրակի» երկրպագուները «Ալաշկերտի» ներկայացուցիչներին սպասում էին մարզադաշտի մուտքի մոտ` հաշվեհարդար տեսնելու մտադրությամբ եւ բազմաթիվ հայհոյանքներ էին հնչեցնում: Ոստիկաններին կրկին հաջողվեց «Ալաշկերտի» ներկայացուցիչներին ապահով հասցնել մինչեւ թիմի ավտոբուսը:

Ցավալի է «Շիրակի» դիրքորոշումը տեղի ունեցածի վերաբերյալ: Խաղից հետո «Շիրակի» գլխավոր մարզիչ Վարդան Բիչախչյանը չցանկացավ մեկնաբանել միջադեպը՝ ասելով, որ իր համար պարզ չէ իրական պատճառը: Սակայն, ամեն ինչ տեղի էր ունեցել մարզչական շտաբի եւ բոլորի աչքի առջեւ:

Աբրահամ Խաշմանյանի մամուլի ասուլիսը չկայացավ «Շիրակի» ներկայացուցիչների առաջարկով եւ հանդիպման տեսուչի համաձայնությամբ՝ չնայած, որ «Ալաշկերտի» գլխավոր մարզիչը պատրաստ էր պատասխանել լրագրողների հարցերին: Իսկ ահա որոշ լրատվամիջոցներ շտապեցին հայտնել, որ «Ալաշկերտի» մարզիչը հրաժարվել է ասուլիսից, ինչը իրականությանը չի համապատասխանում:

Իսկ ահա «Շիրակի» պաշտոնական հայտարարությունում ասվում է, որ երկրպագուներն իբր ոչ մի առնչություն չեն ունեցել միջադեպին, իսկ բախումը սկսվել է այն բանից հետո, որ «անմեղ» երկրպագուներին հայհոյել է Աբրահամ Խաշմանյանը: Թե ինչքանով է հավաստի այն վարկածը, որ հաղթանակ տարած թիմի մարզիչը որոշել է հայհոյել երկրպագուներին, թողնում ենք Ձեր դատին:

Որպես վերջաբան նշենք, որ «Ալաշկերտ» ֆուտբոլային ակումբը միշտ պատշաճ կերպով հյուրընկալում է իր մրցակիցներին և նույն կերպ ճանապարհում է հյուրերին նաև պարտությունների պարագայում»,- ասվում է «Ալաշկերտի» հայտարարությունում:

«Շիրակ». «Ի պատասխան մամուլում տարածված հաղորդագրությանը այսօրվա «Շիրակ» - «Ալաշկերտ» խաղից անմիջապես հետո տեղի ունեցած միջադեպի վերաբերյալ, ցանկանում ենք ճշտում մտցնել իրականությանը: Ոչ մի ծեծկռտուք կամ հարձակում չի եղել երկրպագուների կողմից Աբրահամ Խաշմանյանի վրա: Միակ միջադեպը եղել է ակումբի աշխատակցի եւ Աբրահամ Խաշմանյանի միջեւ, այն էլ այն բանից հետո, երբ վերջինս հայհոյել է երկրպագուներին»,- նշվում է «Շիրակի» հայտարարությունում:

«Ալաշկերտի» եւ «Շիրակի» մամուլի ծառայությունները ներկայացրել է նաեւ միջադեպի տեսանյութը: