Հայաստանում Ռուսաստանի դեսպան Սերգեյ Կոպիրկինը հունիսի 2-ին աշխատանքային այց է կատարել Սյունիքի մարզ։ Կոպիրկինը ծանոթացել է ռուս և հայ սահմանապահների ծառայությանը, որոնք տեղակայված են Գորիս-Կապան ճանապարհին։ Այս մասին հայտնում է դեսպանատան ֆեյսբուքյան էջը։

Սյունիքի մարզում ռուս-թուրքական համաձայնությունների կապակցությամբ ԱՄՆ-ն, Եվրամիությունը, Իրանը, Հնդկաստանը եւ միջազգային կառույցներն ու այլ երկրներ հստակ դիրքորոշում են հայտնել Հայաստանի ինքնիշխանության, տարածքային ամբողջականության եւ Բաքվի զորքերը ՀՀ տարածքից անվերապահ դուրս բերելու մասին: Վերջին շրջանում Հայաստանում Եվրամիության երկրների եւ ԱՄՆ-ի դեսպանները պարբերաբար այցելում են Սյունիքի մարզ եւ հայտարարում զարգացման ծրագրեր իրականացնելու մտադրությունների մասին: Իսկ Իրանի պաշտոնյաները բացահայտ հայտարարում են, որ կա Հայաստանի հարավը զավթելու եւ Իրանը Հայաստանից կտրելու մտադրություն, որն անընդունելի է Իրանի համար:

Ռուսաստանը Հայաստանի ամբողջականության ու ինքնիշխանության վերաբերյալ հայտարարություն չի արել, ավելին՝ Հայաստանի սահմաններն ու տարածքը փաստացի հայտարարել է վիճելի, իսկ իր պրոքսի գործիք Բաքվի ներխուժումները՝ միջադեպ: Դա բնական է, քանի որ Ռուսաստանն իրականացնում է Սյունիքի «արցախացման» եւ Հայաստանը ոչ միայն Իրանից, այլեւ Սյունիքի մարզը Հայաստանից օտարելու ծրագիր:

Լրագիրը ամիսներ առաջ է անդրադարձել այս հեռանկարին: Սյունիքի մարզում «անվտանգության նոր համակարգի կառուցման», Մեղրիի հաղորդակցությունների հանդեպ ՌԴ ՖՍԲ-ի վերահսկողության պայմանավորվածությունները, միջանցքը պատերազմով բացելու Բաքվի պերմանենտ սպառնալիքները, եւ ամենակարեւորը՝ Սյունիքի մարզի «ներքին օտարումը» եւ անպաշտպանության զգացումը անվտանգության սպառնալիքների գեներացման պայմաններում ստեղծում է գործողությունների անհրաժեշտ ֆոնը: Ավելացնենք նաեւ «ներքին օտարման» կարեւոր տարրը՝ Դոնեցկ-Լուգանսկի օրինակով կենտրոնական իշխանությանը հակադրված ռեգիոնալ կուսակցության ստեղծումը:

Վերլուծաբաններն այն կարծիքին են, որ Սյունիքի մարզում աշխարհքաղաքական լուրջ մրցակցություն է սկսել, եւ լուրջ շահեր են խաչվում: Միեւնույն ժամանակ, Ռուսաստանի ու թուրքերի աշխարհքաղաքական ու հաղորդակցական շահերը հստակ ձեւակերպված են, այդ թվում Իրանի հարցում, մասնավորապես՝ Հյուսիս-հարավ նախագիծը ռուս-թուրքական սխեմաներում «տեղավորելու» նպատակով:

Քաղաքագետ Պավել Դալլաքյանն այսպես մեկնաբանեց ՌԴ դեսպանի այցելությունը Սյունիք.

«Այլ դեսպաններ այցելեցին սահման եւ հանդիպեցին իրենց դիվանագիտական կացության վայրում բնակվող պարզ մարդկանց, հայ զինվորականների: Սա օտար պաշտոնական ներկայացուցչության ինստիտուտի համար բացառիկ երեւույթ է եւ վկայում է երկրների միջեւ արտակարգ ջերմ եւ վստահելի հարաբերությունների մասին: Այս ֆոնին պարոն Կոպիրկինի այցելությունը կարելի է գնահատել միմիայն Դոնբաս-Լուգանսկի օրինակով ռեգիոնալ պառակտում հետապնդող ակտ: Դրանից բացի, այցելությունը Հայաստանում ռուս էքսպեդիցիոն կորպուսի զինվորականներին վկայում է երկրում ռուսական ներկայության կղզիացածության մասին՝ Կուբայում ԱՄՆ հայտնի Գուանտանամո հենակետի օրինակով: Կոլաբորացիոնիստական վարչակազմի կեցվածքը հուշում է, որ հորիզոնի վրա է նաեւ «Գուանտանամոյի բանտի» ուրվականը: Արցախի համար անեծք դարձած Պոլյանիչկո-Սաֆոնովի բանտախցերը մեր հիշողության մեջ են»: