Երևանի ավագանու ընտրություններում ֆավորիտները շարունակում են մնալ Տիգրան Ավինյանն ու Հայկ Մարությանը. սՍա են ցույց տալիս 800 երևանցիների շրջանում անցկացված հարցումները։ Այսօր՝ սեպտեմբերի 7-ին հրավիրված ասուլիսի ժամանակ նշեց «GALLUP International association»-ի հայաստանյան ներկայացուցչության տնօրեն Արամ Նավասարդյանը՝ ամփոփելով սեպտեմբերի 5-6–ն անցկացված հարցումները։

Այսպիսով` հարցմանը մասնակցածների 16,3 տոկոսը քվեարկելու է «Քաղաքացիական պայմանագիր» կուսակցության (Տիգրան Ավինյան), 11,8 տոկոսը` «Ազգային առաջընթաց կուսակցության» (Հայկ Մարության), 5,1 տոկոսը` «Մայր Հայաստան» դաշինքի (Անդրանիկ Թևանյան), 3,4 տոկոսը` «Հանրապետություն» կուսակցության (Արտակ Զեյնալյան), 3,6 տոկոսը` «Հանրային ձայն» կուսակցության (Արտակ Գալստյան), 3,8 տոկոսը` «Ապրելու երկիր» կուսակցության (Մանե Թանդիլյան), 3,3 տոկոսը` «Լուսավոր Հայաստան» կուսակցության (Դավիթ Խաժակյան), 2,7 տոկոսը` «Հաղթանակ» կուսակցության (Վիկտոր Մնացականյան) օգտին։


Մնացած տոկոսները բաշխվել են մասնակից մյուս ուժերի միջև։ 22,8 տոկոսը դժվարացել է պատասխանել, իսկ 20 տոկոսն էլ հրաժարվել է հայտնել, թե ում օգտին է քվեարկելու։

«Այս ցուցանիշը, որ հրաժարվում են պատասխանել, բավականին բարձր է, մարդիկ դարձել են ավելի փակ, չեն ուզում կիսվել, միգուցե քաշվում են, միգուցե վախենում են»,– նշեց Նավասարդյանը։

Ի դեպ, հարցման մասնակիցների 55,3 տոկոսն ասել է, որ սեպտեմբերի 17-ին միանշանակ գնալու է քվեարկության, ընտրություններին միանշանակ չմասնակցելու որոշում է կայացրել 19,3 տոկոսը, հարցին դժվարացել է պատասխանել 3,3 տոկոսը։

Նավասարդյանը վստահ է, որ ովքեր դժվարացել են հարցին պատասխանել, միանշանակ չեն մասնակցելու ընտրություններին, ովքեր պատասխանել են «ավելի շուտ` այո», իրենք ևս ընտրություններին չեն գնալու, որովհետև ավելի կարևոր գործ են գտնելու։

«Բոլոր քաղաքական ուժերի աշխատանքի գոնե կեսը պետք է ուղղված լինի նրան, որ մասնակցությունը լինի հնարավորինս մեծ ու ստանանք հնարավորինս արդար պատկեր»,– ասաց Նավասարդյանը։

Գնահատելով ընթացքող նախընտրական քարոզարշավը` մասնագետն այն բավականին թույլ ֆորմատի անվանեց` հույս հայտնելով, որ քարոզարշավի երկրորդ կեսն ավելի ակտիվ է լինելու։

Հավելենք, որ հարցումների ժամանակ նաև երևանաբնակներին հարցրել են` ի՞նչ են կարծում` Երևանի քաղաքապետի պաշտոնը քաղաքակա՞ն է, թե՞ կառավարչի պաշտոն է։

44,1 տոկոսն ասել է, որ կառավարչի պաշտոն է և 41,3 տոկոսն էլ կարծում է` քաղաքական։

Նավասարդյանը հիշեցրեց` ապրիլին հրապարկված տվյալներով` հարցվածների 58,3–ը կարծում էր Երևանի քաղաքապետի պաշտոնը կառավարչի պաշտոն է, իսկ 37,2-ը` քաղաքական։ Այնպես որ, բավականին նկատելի ավելացել է այն մարդկանց թիվը, որոնք Երևանի քաղաքապետի պաշտոնը քաղաքական են համարում։

Հիշեցնենք` Երևանի ավագանու ընտրությունները տեղի կունենան սեպտեմբերի 17-ին:

Երևանի ավագանու ընտրություններին մասնակցելու հայտ է ներկայացրել 13 կուսակցություն և 1 դաշինք.

  1. «Հայաստանի եվրոպական» կուսակցություն,
  2. «Ժողովրդավարական համախմբում» կուսակցություն,
  3. «Քաղաքացիական պայմանագիր» կուսակցություն,
  4. «Հանուն սոցիալական արդարության» կուսակցություն,
  5. «Ուժը հայրենյաց» կուսակցություն,
  6. «Հանրային ձայն» կուսակցություն,
  7. «Ազգային առաջընթաց» կուսակցություն,
  8. «Հաղթանակ» կուսակցություն,
  9. «Ապրելու երկիր» կուսակցություն,
  10. «Հանրապետություն» կուսակցություն,
  11. «Միացյալ Հայաստան» կուսակցություն,
  12. «Արդար Հայաստան» կուսակցություն,
  13. «Լուսավոր Հայաստան» կուսակցություն,
  14. «Մայր Հայաստան» դաշինք («Երկիր ծիրանի» և «Ինտելեկտուալ Հայաստան կուսակցություններ)։