Լոնդոնի Կայսերական քոլեջի քիմիկոսները նոր հայացք են առաջարկել այն հիմնական բաղադրիչների ծագման վերաբերյալ, որոնք հնարավոր են դարձրել կյանքը Երկրի վրա: Վերլուծելով երկնաքարերում ցինկի իզոտոպային անոմալիաները՝ հետազոտողները կարողացել են պարզել, թե Արեգակնային համակարգում որտեղից են առաջացել կենդանի օրգանիզմների ձևավորման համար անհրաժեշտ ցնդող նյութերը, հաղորդում է Science Advances-ը:


Ցնդող բաղադրիչները այն նյութերն են, որոնք խտանում են համեմատաբար ցածր ջերմաստիճանում (1100 Կելվինից պակաս): Դրանք ներառում են վեց հիմնական տարրեր, որոնք հայտնաբերված են ջրում և կենդանի օրգանիզմներում, և որոնք առանցքային դեր են խաղացել Երկրի վրա կյանքի ծագման գործում, հաղորդում է planet-today-ը: Երկար ժամանակ ենթադրվում էր, որ այս տարրերը մեր մոլորակ են բերվել ածխածնային քոնդրիտների դասի երկնաքարերի միջոցով, սակայն տարբեր տեսակի երկնաքարերի ստույգ ներդրումը մնացել է անհայտ:

Գիտնականները որոշել են պարզել, թե այս գործընթացում ինչ դեր ունեն տիեզերական տարբեր մարմինները։ Իրենց աշխատանքի ընթացքում նրանք տարբեր մոլորակայիններից՝ վաղ Արեգակնային համակարգում ձևավորված պարզունակ մարմիններից եկած երկնաքարերում վերլուծել են ցինկի իզոտոպները: Այս մարմինները Երկրի համար շինանյութի դեր են խաղացել։


Հետազոտությունը ցույց է տվել, որ Երկրի ցինկի միայն 10%-ն է ստացվել հալած մոլորակածիններից, թեև դրանք կազմում են մեր մոլորակի զանգվածի մոտ 70%-ը: Ցինկի հիմնական մասը և, հետևաբար, այլ ցնդող տարրերն առաջացել են հալման չենթարկվող ավելի պարզունակ նյութից: Այս հայտնագործությունն օգնում է ավելի լավ հասկանալ Երկրի վրա կյանքի համար հիմք են դարձած ցնդող տարրերի ծագումը:

Այս արդյունքները ոչ միայն լույս են սփռում Երկրի ձևավորման վաղ փուլերի վրա, այլև այլ մոլորակների վրա կյանքի որոնման համար նոր գործիք են տրամադրում: Քիմիական տարրերի էվոլյուցիան միլիոնավոր և նույնիսկ միլիարդավոր տարիների ընթացքում հետևելու կարողությունը նոր հեռանկարներ է բացում՝ գնահատելու համար Արեգակնային համակարգում և դրանից դուրս այլ աշխարհների բնակեցվածությունը: